தி.மு.க. வேட்பாளர் பட்டியல் வெளியீடு


முதல்வர் கருணாநிதி
முதல்வர் கருணாநிதி
திமுக தலைவரும் தமிழக முதல்வருமான மு.கருணாநிதி எதிர்வரும் தமிழக சட்டமன்றத் தேர்தலில் தி.மு.க போட்டியிடும் தொகுதிகளில் தேர்தலில் நிற்கவுள்ள தனது கட்சி வேட்பாளர்களின் பட்டியலை வியாழனன்று வெளியிட்டுள்ளார்.

119 தொகுதிகளில் திமுக இம்முறை போட்டியிடுகிறது.

கருணாநிதி முதல்முறையாக தனது சொந்த ஊரான திருவாரூரில் போட்டியிடுகிறார். அங்கிருந்துதான் தேர்தல் பிரச்சாரத்தையும் துவக்கவிருப்பதாக அவர் தெரிவித்துள்ளார்.

கருணாநிதியின் மகனும் துணை முதல்வருமான ஸ்டாலினும் இதுவரை ஆயிரம்விளக்குத் தொகுதியிலிருந்து போட்டியிட்டுவந்தார். ஆனால் இப்போது அவர் புறநகர் பகுதியிலுள்ள கொளத்தூரிலிருந்து போட்டியிடுகிறார்.

அமைச்சர் க.அன்பழகனும் துறைமுகம் தொகுதியிலிருந்து வில்லிவாக்கத்திற்கு மாறியிருக்கிறார்

அமைச்சர்க்ள் ஆற்காடு வீராசாமி மற்றும் கோசி மணி ஆகியோர் இம்முறை போட்டியிடவில்லை. அவர்கள் உடல்நலம் இடம்தராததே அதற்கு காரணம் என்று கருணாநிதி தெரிவித்துள்ளார்.

முன்னாள் அஇஅதிமுக அமைசர் முத்துசாமி ஈரோட்டிலிருந்து போட்டியிடுகிறார், அதே போல அண்மையில்தான் அஇதிமுகவிலிருந்து திமுகவிற்கு வந்த சேகர்பாபு வடசென்னை ஆர்.கே. நகர் தொகுதியில் போட்டியிடுகிறார்.

119 தொகுதிகளில் போட்டியிட்டாலும் பெரும்பான்மை இடங்களில் வெல்லமுடியும் என்ற நம்பிக்கை தனக்கிருப்பதாக வேறு ஒரு கேள்விக்கு பதிலளிக்கையில் கருணாநிதி கூறினார்.

ஜெயலலிதா பிரச்சாரம் ஒத்திவைப்பு

இதனிடையே அஇஅதிமுக பொதுச்செயலாளர் ஜெயலலிதா கூட்டணிக் கட்சிகளுடன் தொகுதிப் பங்கீடு குறித்த பேச்சுவார்த்தை முடிவடையாத நிலையில், மார்ச் 18 அன்று மதுரையிலிருந்து தான் துவங்கவிருந்த தேர்தல் பிரச்சாரத்தினை வேறு ஒரு தேதிக்கு ஒத்திவைப்பதாக இங்கு வெளியிட்டுள்ள அறிக்கையொன்றில் கூறியிருக்கிறார்.