ஒட்டக வணிகம்: ஆஸ்திரேலியா ஊக்கம்

ஆஸ்திரேலியாவில் நலிந்து வருகின்ற ஒட்டக வளர்ப்புத் தொழில்துறை சர்வதேச சந்தையில் ஒட்டக இறைச்சிக்கும் ஒட்டகப் பாலுக்கும் உள்ள வரவேற்பைப் பயன்படுத்திக்கொள்ள வேண்டும் என்ற நோக்கில் அத்தொழில்துறைக்கு அந்நாட்டின் அரசாங்கம் மானியம் வழங்கியுள்ளது.
ஆஸ்திரேலியாவுக்குள் ஆரம்பத்தில் வந்து குடியேறியவர்கள் இந்தக் கண்டத்துக்குள் ஒட்டகங்களை அறிமுகப்படுத்தியிருந்தனர். பின்னர் அவை காடுகளில் பெருக ஆரம்பித்ததிலிருந்து அவற்றின் எண்ணிக்கை பெரிதும் அதிகரித்து விட்டுள்ளன.

ஒட்டக எண்ணிக்கை அதிகரிப்பு

ஆஸ்திரேலியாவின் அதி உட்பகுதிகளில் பத்து லட்சத்துக்கும் அதிகமான ஒட்டகங்கள் மேய்ந்துகொண்டிருக்கின்றன. இந்த எண்ணிக்கை அடுத்த பத்து ஆண்டுகளில் இரு மடங்காக அதிகரித்துவிடும் என்று மதிப்பிடப்பட்டுள்ளது.

இந்த ஒட்டகங்கள் பல்கிப் பெருகுவதால், அவை ஆஸ்திரேலியாவில் பெரும் பிரச்சினையாக உருவெடுத்திருப்பதால், அவற்றை ஆயிரக்கணக்கில் கொல்லும் நடவடிக்கையில் குறிபார்த்துச் சுடுபவர்கள் ஈடுபடுத்தப்படுகிறார்கள்.

வெறுமனே இந்த ஒட்டகங்களைச் சுட்டு அவற்றின் சடலங்களை அழுக விடுவதை விட, கவனமாக கட்டுப்படுத்தப்பட்ட ஒரு வணிகத்தின் மூலம் அவற்றை பிறநாடுகளுக்கு ஏற்றுமதி செய்வதன் மூலம் அவற்றின் எண்ணிக்கையை குறைக்கலாம் என்று இறைச்சி வணிகக் நிறுவனங்கள் கூறுகின்றன.

ஏற்றுமதி ஊக்க மானியம்

மத்திய கிழக்கு, மலேசியா மற்றும் தாய்லாந்து ஆகிய நாடுகளில் சந்தை வாய்ப்பைப் பெறுவதற்காக ஆஸ்திரேலியாவின் ஒட்டக வளர்ப்புத் தொழில்துறைக்கு அரசாங்கம் ஒரு சிறிய வளர்ச்சி நிதியுதவியை தருகிறது.

ஒட்டக உற்பத்திப் பொருட்களை ஏற்றுமதி செய்வதென்பது ஆஸ்திரேலியாவில் பல லட்சம் டாலர்கள் பெருமதி கொண்ட ஒரு பெரிய தொழில்துறையாக வளரும் என்று இத்தொழில்துறையின் பிரதிநிதிகள் நம்பிக்கை தெரிவித்துள்ளனர்.


ஒட்டகத்தின் திமிலில் இருக்கும் கொழுப்பு , ஒட்டகத்தின் சிறுநீர், ஒட்டகத்தின் பற்கள் ஆகியவை ஜப்பானில் நிறையத் தேவைப்படுகிறது.


படி மகூக்

மனிதரைப் பொறுத்தவரை அவர்களது முக்கிய உணவு இறைச்சி. அடுத்து மிகவும் வேகமாக வளர்ந்துவரும் தொழிற்துறை பால் உற்பத்தித்துறையாகும். மிகவும் சுகாதாரமான உணவு என்ற வகையில் பாலுக்கான தேவையும் மிகவும் அதிகரித்து வருகிறது. ஆகவே இந்தத்துறையில் பெருமளவு ஆய்வு செய்யப்பட வேண்டும் என குயின்ஸ்லாந்தில் ஏற்றுமதி நிறுவனம் ஒன்றை நடத்துபவரான பாடி மக்கூக் கூறுகிறார்.

மாட்டிறைச்சைக்கு மாற்றாக வளங்கப்படக் கூடிய கொழுப்புக் குறைந்த உணவு ஒட்டக இறைச்சி. தலைமுடி மற்றும் தோலின் பராமரிப்புக்கு பயன்படுத்தும் பொருட்களின் உற்பத்திக்காக ஒட்டகத்தின் சிறுநீர் ஏற்றுமதி செய்யப்படுகின்றது.