கல்வி விசா: பிரிட்டனில் சர்ச்சை

கல்வி கற்பதற்காக பிரிட்டனுக்குள் ஐரோப்பிய ஒன்றியத்திற்கு வெளியிலிருந்து வந்துள்ள வெளிநாட்டு மாணவர்களில் ஐந்தில் ஒரு பங்கு அளவானோர், வந்து ஐந்து வருடங்களாகியும் பிரிட்டனிலேயே தங்கியிருப்பதாக புதிய ஆய்வுகள் சுட்டிக்காட்டுகின்றன.
வெளிநாட்டவர்கள் பிரிட்டனுக்குள் வர அனுமதிப்பதில், சாதுரியமான கட்டுப்பாடுகளை நடைமுறைப்படுத்தப்போவதாக குடிவரவுத்துறை அமைச்சர் டேமியன் கிரீன் கூறுகின்றார்.

ஒக்ஸ்போர்ட், கேம்பிரிட்ஜ், த லண்டன் ஸ்கூல் ஒஃப் எக்கனாமிக்ஸ் போன்ற உலகப் பிரசித்தி பெற்ற பல்கலைக்கழகங்கள், கல்லூரிகள் காரணமாக நீண்டகாலமாகவே கல்விக்கு பிரசித்தமான இடமாக பிரிட்டன் இருந்துவருகிறது.

2009ம் ஆண்டில், முந்தைய ஆண்டுகளைக் காட்டிலும் மூன்று மடங்குக்கும் அதிகமான மாணவர் வீசாக்கள் பிரிட்டனில் விநியோகிக்கப்பட்டுள்ளன.

அரசாங்கம் நடத்தியுள்ள புதிய ஆய்வுகளின்படி, பிரிட்டனில் கல்வியை நிறைவு செய்து கொண்டதன் பின்னர், பெரும் எண்ணிக்கையிலான மாணவர்கள் இங்கேயே தங்கிவிடுவதாக சுட்டிக்காட்டப்பட்டுள்ளது.

2004ம் ஆண்டில், கற்கை நெறிகளை ஆரம்பித்த 185 ஆயிரம் பேரில், ஐந்தில் ஒருவர் என்ற அளவுக்கும் அதிகமானோர் ஐந்து வருடகாலமாக இன்னும் பிரிட்டனிலேயே தங்கியிருக்கின்றனர்.

இந்த எண்ணிக்கையை குறைப்பதற்கான வழிமுறைகள் குறித்து ஆராயவுள்ளதாக பிரிட்டனின் குடிவரவுத்துறை அமைச்சர் டேமியன் கிரீன் கூறியுள்ளார்.

பிரிட்டன்வாசிகளில் நாட்டிலிருந்து வெளியேறி்யோரின் எண்ணிக்கை போக இங்கு குடியேறியுள்ளோரின் எண்ணிக்கையின் நிகர அளவைக் கட்டுப்படுத்துவதற்கு அரசு எடுத்துள்ள விரிவான திட்டங்களின் ஒரு அங்கமாக இதனை முன்னெடுக்கவுள்ளதாக டேமியன் கிரீன் தெரிவித்துள்ளார்.

Read more...

பள்ளிவாசலில் மோதல்; இருவர் பலி



திருவாரூர் மாவட்டம் தி்ருவிடைச்சேரியில் ஒரு பள்ளிவாசலில் தொழுகை நடத்துவது தொடர்பாக இரு பிரிவினரிடையே ஏற்பட்ட மோதலில் 2 பேர் சுட்டுக் கொல்லப்பட்டனர்.
திருவிடைச்சேரி கிராமத்தில் உள்ள சில முஸ்லீம்கள் அங்குள்ள ஜமீத் முகைதீன் பள்ளிவாசலுக்குச் செல்லாமல் தனியார் ஒருவரது இல்லத்தில் தொழுகை நடத்தி வந்தனர்.

இது சமூகக் கட்டுப்பாட்டு விதிகளுக்கு முரணானது என்று கூறி தனியார் இல்லத் தொழுகையை நிறுத்துமாறு கிராமத்து ஜமாத்தினர் கேட்டுக்கொண்டனர் மேலும் அது குறித்து பேச்சுவார்த்தை நட்த்தவருமாறு புறக்கணிப்புக் குழுவிற்கு அழைப்பு அனுப்ப்ப்பட்டது.

ஞாயிறு இரவு பேச்சுவார்த்தை நடந்துகொண்டிருக்கும்போதே, புறக்கணிப்புக் குழுவைச் சேர்ந்த ஹாஜி முகம்மது என்பவர் தனது கைத்துப்பாகியினால் அங்கு குழுமியிருந்தவர்கள் மீது சுட்டதாகக் கூறப்படுகிறது.

அதில் பள்ளிவாசல் இமாம் இஸ்மாயிலும் இன்னொருவரும் உயிரிழந்தனர். மேலும் நால்வர் காயமுற்றனர்.

துப்பாக்கியால் சுட்டதாகக் கூறப்படும் முகம்மதுவும் மற்றவர்களும் அங்கிருந்து தப்பிவிட்டனர். ஆனால் பின்னர் போலீசார் மோதலில் சம்பந்தப்பட்டதாக 10க்கும் மேற்பட்டோரைக் கைது செய்துள்ளனர்.

முகம்மதுவின் வீட்டில் சோதனை போடப்பட்டு இருக்கிறது.

தற்போது மத்திய மண்டல ஐஜி கரன் சின்ஹாவும் வேறு சில உயர் அதிகாரிகளும் திருவிடைச்சேரியில் முகாமிட்டுள்ளனர். நிலைமை கட்டுக்குள் இருப்பதாக அங்கிருந்துவரும் செய்திகள் கூறுகின்றன.

Read more...

அரசியல் சட்ட திருத்தம்: த.தே.கூ. எதிர்ப்பு


நாடாளுமன்ற உறுப்பினர் சுமந்திரன்
நிறைவேற்றதிகாரம் கொண்ட ஜனாதிபதி பதவியை வலுப்படுத்திக்கொள்ளும் நோக்கில் இலங்கை அரசு புதன் கிழமை நாடாளுமன்றத்தில் கொண்டுவரவுள்ள 18வது அரசியல் சட்டத்திருத்த மசோதாவை எதிர்த்து வாக்களிப்பது என்று தமிழ் தேசியக் கூட்டமைப்பு தீர்மானித்துள்ளது.

சுமந்திரன் செவ்வி

திங்கட்கிழமையன்று இக்கூட்டமைப்பின் நாடாளுமன்ற உறுப்பினர்கள் நடத்திய கூட்டத்தில் இந்த முடிவு ஏகமனதாக எடுக்கப்பட்டதாக நாடாளுமன்ற உறுப்பினர் சுமந்திரன் தமிழோசையிடம் தெரிவித்தார்.

இந்த சட்டமூலம் நாட்டுக்குப் பெருந்தீங்கு செய்வதுடன், சிறுபான்மை இன மக்களுக்கும் பெரும் ஆபத்தை விளைவிக்கக்கூடியது என்று தாங்கள் கருதுவதாக அவர் கூறினார்.

இலங்கையில்நிறைவேற்றதிகாரம் கொண்ட ஜனாதிபதி பதவிக்கு தமிழ்க் கட்சிகள் வரலாற்று ரீதியாகப் பார்க்கையில் பெரிய எதிர்ப்பைக் காட்டியதில்லை, உண்மையில் சர்வாதிகாரம் கொண்ட ஜனாதிபதியாலேயே இந்த இனப்பிரச்சினைக்குத் தீர்வு காணமுடியும் என்று தமிழ்க் கட்சிகளிடையே ஒரு கருத்து நிலவியது என்பதை சுமந்திரன் ஒப்புக்கொண்டார்.

"ஆனால் தற்போது எந்த சிறுபான்மைக்கட்சிகளும் அந்த கருத்தைக் கொண்டிருக்கவில்லை. ஏனென்றால், நிறைவேற்றதிகாரம் கொண்ட ஜனாதிபதை முறைமை, கடந்த 30 ஆண்டுகளில் சிறுபான்மைப் பிரச்சினைகளை தீர்க்கவில்லை என்பதே யதார்த்தம்" என்று சுமந்திரன் கூறியுள்ளார்.

மேலும், பலருக்குத் தெரியாத பல ஷரத்துக்கள் இந்த சட்டமூலத்த்தில் இடம் பெற்றிருக்கின்றன என்று கூறிய சுமந்திரன், முன்பு கொண்டுவரப்பட்ட 13வது சட்டத்திருத்தம், 17வது சட்டத்திருத்தம் ஆகியவற்றை பாதிக்கும் பல பிரிவுகள் இவற்றில் இருப்பதாகவும்ம, எனவே இந்த சட்டமூலத்தை தமிழ் தேசியக் கூட்டமைப்பு ஆதரிக்க முடியாது என்றும் தெரிவித்தார்.

தமிழ்த் தேசியக் கூட்டமைப்பின் 14 உறுப்பினர்களில் பலர் வெளிநாடுகளில் இருப்பதால், அவசரமாக நடத்தப்படும் இந்த வாக்கெடுப்பில் அவர்கள் அனைவரும் கலந்துகொள்ள முடியாத சூழ்நிலை இருக்கிறது என்று சுமந்திரன் கூறினார்.

Read more...